Ecoloxistes n’Aición d’Asturies considera un auténticu actu de censura y represión a les llibertaes fundamentales, el fallu de la Xunta Electoral Central, prohibiendo les espresiones de llibertá ya indignación del Movimientu 15-M, y sorraya que, precisamente un fallu d’esta naturaleza, demuestra que la maxistratura tien de tar suxeta a un fondu tresformamientu, qu’alloñe influencies dictatoriales d’esti esencial poder del estáu.

Mientres el clamor multitudinariu del Movimientu 15-M anubre les places españoles d’indignación poles inxusticies sociales que la sociedá ta careciendo, y d’ilusión por consiguir cambeos nel modelu políticu, económicu y social tan esenciales como urxentes y necesarios, la Xunta Electoral Central, declara illegales les sos movilizaciones, despreciando d’esta miente, según la organización ecoloxista, los derechos a la llibertá d’espresión, xunta y manifestación.

Coles mesmes, y ante la prevocación ya irresponsabilidá de la Xunta Electoral Central, Ecoloxistes n’Aición d’Asturies considera que ye enforma mayor la llexitimidá social de quien protesten buscando un bien común universalizable, qu’aquella otra qu’apuerta d’una interpretación llegal pacata, restrictiva y alloñada de la realidá.

Por tou ello, Ecoloxistes n’Aición d’Asturies súmase a la llamada de la ciudadanía a siguir alantre con esti actu de responsabilidá cívica, faciendo usu del derechu a la resistencia p’amparar una desobediencia civil pacífica.

Finalmente, la organización ecoloxista, pon l’acentu en que se reflexe’l doble raseru aplicáu polos poderes, que non ilegalizan práctiques financieres fraudulentes, propies de la economía de mercáu y que provocaron l’actual crisis, y sicasí escuerren a quien soporten, precisamente, les consecuencies d’eses práctiques, d’esa cultura corrupta.